काठमाडौं– स्वास्थ्य तथा जनसंख्यामन्त्री भानुभक्त ढकालले एचआईभी एड्स संक्रमण नियन्त्रणमा नेपालले महत्वपूर्ण उपलब्धि हासिल गरेको बताएका छन्।
विश्व एड्स दिवसका अवसरमा मंगलबार ढकालले सन् १९९० को दशकमा विश्वयापी महामारीको रुपमा रहेको एड्सको संक्रमण नियन्त्रणमा नेपालले महत्वपूर्ण उपलब्धि हासिल गरेको बताएका हुन्।
विश्वले सन् २०१० देखि २०१९ सम्म एड्सको कारणले हुने मृत्युदर ३९ प्रतिशतले घटाएकोमा नेपालले ८५ प्रतिशतले घटाएको मन्त्री ढकालको दाबी छ।
नयाँ संक्रमणको दर विश्वले २३ प्रतिशतले घटाउँदा नेपालले ६४ प्रतिशतले घटाउन सफल भएको ढकालेको भनाइ छ।
उनले दिगो विकास लक्ष्यअनुसार सन् २०३० सम्ममा एड्सको महामारी अन्त्य गर्ने प्रतिबद्धताका साथ योजनाबद्ध रुपमा काम अगाडि बढाएको बताए।
कोरोना महामारीले एचआईभी संक्रमित र एचआईभी सर्न सक्ने जोखिम समूहलाई स्वास्थ्य सेवा पहुँचमा अफ्ठ्यारो र चुनौती सिर्जना गरेको मन्त्री ढकालले बताए।
मन्त्री ढकालले एचआईभी संक्रमितलगायत उनीहरूको परिवारका सदस्यलाई निःशुल्क स्वास्थ्य बीमा कार्यक्रम लागू गरिएको पनि जानकारी दिए।