अर्थ

विदेशी लगानीका कम्पनीले विदेशी मुद्रामै ऋण पाउने

1603113213.jpg

काठमाडौं- विदेशी लगानीका कम्पनीहरुले अब विदेशी मुद्रामै ऋण लिन पाउने भएका छन्।

NLG Insurance
agrakhi
Yeti parketing

नेपाल राष्ट्र बैंकले बुधबार सूचना जारी गरी कुनै पनि विदेशी लगानी रहेको कम्पनी वा संस्थाले आफ्नो ‘प्यारेन्ट’ कम्पनी वा ग्रुप अफ कम्पनीबाट ऋण लिन चाहेमा विदेशी मुद्रामा नै ऋण लिन पाउने व्यवस्था गरेको हो। 

नेपाल राष्ट्र बैंकले चालू आर्थिक वर्षको मौद्रिक नीतिको त्रैमासिक समीक्षा मार्फत् यस्तो व्यवस्था गरेको थियो। यो व्यवस्था लागू गर्न नेपाल राष्ट्र बैंकले बुधबार सूचना जारी गरेको हो। 

यो सूचनासँगै बैंक तथा वित्तिय संस्थाबाट विदेशी लगानीका कम्पनीहरुले विदेशी मुद्रामै ऋण लिन सक्नेछन्। यसअघि विदेशी लगानीका कम्पनीहरुले विदेशबाट ऋण लिए पनि नेपाली मुद्रामा परिवर्तन गरेर लिनुपर्थ्याे।

हाल विदेशी मुद्रा पर्याप्त भएका कारण राष्ट्र बैंकले कम्पनीहरुलाई यो सुविधा दिएको हो। नेपाल राष्ट्र बैंकका अनुसार गत मंसिर महिनासम्ममा नेपालमा बैदेशिक मुद्राको सञ्चिती १४ खर्ब ७४ अर्ब ३४ करोड रुपैयाँ छ। 

त्यस्तै नेपालमा रहेका कम्पनीहरुले विदेशी मुद्रामा ऋण लिँदा विभिन्न शर्तहरु भने पुरा गर्नुपर्नेछ।

राष्ट्र बैंकका अनुसार सबैभन्दा पहिले ऋण लिने कम्पनीले उसको नियामक निकायबाट ऋण लिनको लागि स्वीकृति पत्र लिनुपर्छ। त्यस्तै ऋण लिने र दिनेबीच सम्झौता भएको प्रमाण, बैंकिङ प्रणालीबाटै ल्याउने प्रतिबद्धता पत्र, विदेशबाट ऋण लिनुपर्ने आवश्यकता पुष्टि हुने कागजात, ऋण लिनेसम्बन्धी निर्णय भएको सञ्चालक समितिको माइन्युटको प्रतिलिपि, कर चुक्ता भएको प्रमाणपत्र, कम्पनी अद्यावधिक विवरण, प्रबन्ध पत्र र नियमावली भएको प्रमाणपत्रहरु समेत नेपाल राष्ट्र बैंकमा पेश गनुपर्छ। 

त्यस्तै ऋण लिने कम्पनी कालोसूचीमा नपरेको प्रमाण, विनिमय जोखिमको सम्भावना र त्यसलाई व्यवस्थित गर्ने आधार खुल्ने कागजात, कर्जा ल्याउने र फिर्ता लैजाने कागजात, विदेशबाट ल्याउने भनिएको ऋण नेपालबाट लिन नसक्ने अवस्था सिर्जना भएको निवेदन पनि पेश गर्नुपर्ने प्रावधान छ। 

राष्ट्र बैंकले विदेशी लगानीकर्ताले लगानी गरेको रकमको ६० प्रतिशत भन्दा बढी रकम बराबरको ऋण लिन नपाउने पनि व्यवस्था गरेको छ। नेपालमा रहेका कम्पनीहरुले विदेशी मुद्रामा ऋण लिन चाहेमा धेरै ब्याज तिर्न नपरोस् भनेर ब्याजदरमा पनि  राष्ट्र बैंकले सीमा लगाएको छ। 

यदि अमेरिकी डलरमा विदेशी कम्पनीबाट ऋण लिन चाहेमा सो कम्पनीले एक वर्षको लिवोर कष्ट र त्यसभन्दा बढी ३ प्रतिशत मात्र थपी ब्याजदर निर्धारण गर्नुपर्ने छ यदि सोभन्दा बढी भएमा नेपालका कम्पनीले सो ऋण लिन पाउने छैनन्। 
त्यस्तै भारतीय रुपैयाँको हकमा मार्जिनल लागतमा आधारित ब्याजदरको औषतसम्म र चीनबाट लिने ऋणीको हकमा एक वर्षको कर्जाको प्राइम रेटसम्म हुने गरी ब्याजदर निर्धारण हुनुपर्ने छ।

विदेशबाट ल्याएको रकम तोकिएको क्षेत्रमा उपयोग हुनुपर्नेछ भने ३५ दिनभित्र अनिवार्य रुपमा राष्ट्र बैंकमा लेखांकन गराउनुपर्ने प्रावधान पनि राखिएको छ। 

यस्तो प्रावधानले विदेशी लगानी नेपालमा कति आएको रहेछ भन्ने कुरा प्रष्ट हुने नेपाल राष्ट्र बैंकका सहप्रवक्ता नारायण पोखरेलले जानकारी दिए। उनका अनुसार हाल नेपालमा कतिवटा कम्पनीमा विदेशी लगानी छ भनेर लेखांकन भएको छैन। उनीहरुले विदेशमा रकम लैजानुपर्दा मात्र लेखांकनको लागि राष्ट्र बैंक जाने गरेका छन्। 

यो व्यवस्थासँगै नेपालमा भएको लगानी विदेश लैजान लगानीकर्ताहरुको लागि पनि सहज हुने सहप्रवक्ता पोखरेलले जानकारी दिए। 
 

प्रतिक्रिया दिनुहोस्