काठमाडौं– सत्तारुढ गठबन्धनले सरकार संचालनमा सहयोग गर्न भन्दै बनाएको कार्यदलको बैठक जारी छ। प्रधानमन्त्रीको सरकारी निवास बालुवाटारमा बैठक बसिरहेको हो।
बैठकमा सरकारको न्यूनतम साझा कार्यक्रम बनाउने बारे छलफल भइरहेको छ। बालुवाटार स्रोतका अनुसार आजको बैठकले न्यूनत साझा कार्यक्रमको अन्तिमरुप दिनेछ।
आइतबार कार्यदलका केही नेताहरूले कार्यक्रमको मस्यौदा तयार गरेको र त्यसलाई आज अन्तिमरुप दिने तयारी भएको कार्यदलका एक सदस्यले जानकारी दिए।
कार्यदलले कोरोना नियन्त्रण र केपी शर्मा ओली नेतृत्व सरकारले विधि मिचेर गरेका नियुक्ति उल्टाउन सिफारिस गर्ने बताइएको छ।
कांग्रेस महामन्त्री पूर्णबहादुर खड्का नेतृत्वको कार्यदलमा कांग्रेसबाट मिनेन्द्र रिजाल र रमेश लेखक, माओवादी केन्द्रबाट वर्षमान पुन र देव गुरुङ, जनता समाजवादीबाट महेन्द्र राय यादव र राजेन्द्र श्रेष्ठ सदस्य छन्।