उत्कृष्ट उद्यमी सम्मानित

तनहुँ– घरेलु तथा साना उद्योग कार्यालय तनहुँले जिल्लाका उत्कृष्ट उद्यमीलाई सम्मान गरेको छ। छैटौँ उद्योग दिवसको अवसरमा मंगलबार कार्यालयले चार उद्यमीलाई सम्मान गरेको हो।

औद्योगिक विकासको क्षेत्रमा योगदान पुर्याएवापत सफल उद्यमीको रूपमा व्यास नगरपालिका २ स्थित दीपेन्द्र सुज सेन्टर, बन्दीपुर गाउँपालिका ५ स्थित तिवारी फर्निचर उद्योग, व्यास नगरपालिका १ स्थित पुष्प होजियारी स्वीटर उद्योग र व्यास नगरपालिका ५ स्थित सुवोध फुड्स सम्मानित भएका छन्।

जिल्ला समन्वय समिति तनहुँका उपप्रमुख पवित्रा पौडेलले सफल उद्यमीलाई सम्मानपत्र प्रदान गरेका थिए। त्यस अवसरमा पौडेलले सरकारले औद्योगिक विकासका लागि उपयुक्त वातावरण सिर्जना गर्नुपर्ने बताए।  

प्रमुख जिल्ला अधिकारी सागर आचार्यले औद्योगिक विकासका लागि राम्रो वातावरण सिर्जना गर्न हरेक क्षेत्रबाट सहयोग पुर्याउनुपर्ने धारणा राखे। घरेलु कार्यालयका प्रमुख नारायणप्रसाद ढकालले स्थानीयस्तरमा रोजगारी प्राप्त गराउन कार्यालयले सीपमूलक तालिम सञ्चालन गर्दै आइरहेको बताए।