नोबेल अस्पतालमा सुनसरीका दुई संक्रमितको मृत्यु

विराटनगर– नोबेल शिक्षण अस्पताल विराटनगरमा कोरोना संक्रमित २ जनाको मृत्यु भएको छ । 

उपचारका क्रममा मंगलबार राति मृत्यु भएका दुवै जना सुनसरीका हुन् । सुनसरीको रामधुनी नगरपालिका–६ का ४० वर्षीय पुरुषकोे राति ११ः४० बजेतिर ज्यान गएको छ ।

श्वासप्रश्वासमा समस्या भएपछि उपचारका लागि हिजो दिउँसो अस्पताल ल्याइएका उनको पीसीआर परीक्षण गराउँदा साँझ रिपोर्ट पोजिटिभ आएको अस्पतालका प्रबन्धक नारायण दाहालले जानकारी दिए । 

धरान उपमहानगरपालिका–७ की ५० वर्षीया महिलाको राति ९ः१५ बजे मृत्यु भएको छ । दाहालका अनुसार महिलालाई कोरोना पुष्टि भएपछि उपचारका लागि मंसिर ६ गते अस्पताल भर्ना गरिएको थियो । महिलामा ज्वरो आउने, श्वास फेर्न गाह्रो हुने लगायतका समस्या रहेको उनले बताए ।  

दुवै शव व्यवस्थापनका लागि प्रक्रिया अघि बढाइएको दाहालले बताए ।