राष्ट्रपति भण्डारी छठ पूजामा सहभागी नहुने 

काठमाडौं– राष्ट्रपति विद्यादेवी भण्डारी कोरोनाको महामारीका कारण यस वर्षको छठ पर्वका अवसरमा काठमाडौँका विभिन्न स्थानमा हुने पूजामा सहभागी नहुने भएकी छिन् । 

राष्ट्रपतिको कार्यालयले विज्ञप्ति जारी गरी छठ पर्वका कार्यक्रमहरुमा सहभागी नहुने जनाएको हो । कोरोनाको महामारीका कारण यस्तो निर्णय लिइएको विज्ञप्तिमा उल्लेख छ । 

राष्ट्रपति भण्डारी विगत वर्षमा काठमाडौँका गुहेश्वरी–गौरीघाट र कमलपोखरीमा सहभागी हुने गरेकी थिइन्। 

नेपालको विशेषगरी तराई तथा मधेश क्षेत्रमा मनाइने छठ पर्व हाल काठमाडौं उपत्यकालगायत अन्य पहाडी तथा हिमाली जिल्लाहमा समेत हर्षोल्लासका साथ मनाइन्छ । तर यस वर्ष कोरोना भाइरसको संक्रमणका कारण अघिल्ला वर्षहरुमा जस्तो छठ पर्वको उल्लास छैन ।

कार्तिक शुक्ल चतुर्थीदेखि पञ्चमी, षष्ठी र सप्तमीका दिनसम्म नदी, तालतलैया वा पोखरीका किनारमा अस्ताउँदो र भोलिपल्ट उदाउँदो सूर्यलाई अर्घ दिएर यो पर्व मनाइन्छ ।