जनकपुरधाम– तराई मधेशमा मनाइने लोक आस्थाको पर्व छठको दोश्रो दिन बिहीबार खरना विधि सम्पन्न भएको छ।
पर्वको विधि अनुरुप व्रतालुहरूले दिनभरि निराहार उपवास बसी साँझ सक्खर दूध र चामल मिश्रित खीर, मुला, फलफूललगायत परिकार कुलदेवता र पुर्वजलाई नैवेद्य चढाई खरना मनाएका छन्।
खरना विधिमा व्रतालुले माटोको नयाँ चुलो र माटोकै नयाँ भाँडोमा खीर बनाउने चलन छ।
खीर, पानको पात, सुपारी, मुलालगायतका प्रसाद सामग्री केराको पातमा कुल देवता रहेको घरको कोठामा माटोले लिपपोत गरी नैवेद्य कुल देवता र पुर्वजलाई चढाउने गरिन्छ।
छठका दिन भगवान सूर्यलाई जतिवटा अर्घदान गरिन्छ, खरनामा त्यतिकै संख्यामा नैवेद्य चढाउने गरिन्छ।
खरना विधि सम्पन्न भए पश्चात व्रतालुहरूले दिनभरिको उपवास नैवेद्य चढाइएको सोही प्रसादले तोडेका छन्।
यसअघि बुधवार नहाय खाय विधि सम्पन्न गरिएको थियो भने शुक्रबार षष्ठी तिथीका दिन अस्ताउँदो सूर्यलाई र सप्तमी तिथी शनिबारका दिन उदाउँदो सूर्यलाई अर्घ अर्पण गरी पारण गर्दै छठ पर्व सम्पन्न हुनेछ।