काठमाडौं- सरकारले संघीय संसद्मा शपथ विधेयक पेस गर्ने निर्णय गरेको छ। सोमबार बसेको मन्त्रिपरिषद बैठकले सार्वजनिक पदमा नियुक्त व्यक्तिले गर्नुपर्ने शपथ सम्बन्धी विधेयक संसद्मा पेस गर्न स्वीकृति दिएको सरकारका प्रवक्तासमेत रहेका कानुनमन्त्री ज्ञानेन्द्रबहादुर कार्कीले जानकारी दिए।
सार्वजनिक व्यक्तिले लिनुपर्ने शपथसम्बन्धी व्यवस्था नै लागू नभएको अवस्थामा परराष्ट्रमन्त्री डा नारायण खड्काले कार्यान्वयनमा नरहेको कानुनको ढाँचामा शपथ लिएको भन्दै विवाद भएको थियो।
तत्कालीन प्रधानमन्त्री केपी शर्मा ओलीले शपथसम्बन्धी अध्यादेश ल्याएका थिए। सोही अनुसार खड्काले पनि राष्ट्रपतिसँग शपथ लिएका थिए। तर गत जेठ ६ मा ओली सरकारले ल्याएको शपथसम्बन्धी अध्यादेश निष्क्रिय भइसकेको छ।
कानुनविद्हरूले खड्काको नियुक्ति असंवैधानिक भएको भन्दै विरोध गरेका थिए।