पाँचथर– पाँचथरको हिलिहाङ गाउँपालिका ३ पञ्चमीस्थित तुम्बुङमा गए राति एक घरमा आगलागी भएको छ।
स्थानीय शर्ण योङहाङको घर आगलागीबाट पूर्णरूपमा क्षति भएको छ। आगलागीबाट पाँच लाख ८६ हजार बराबरको क्षति भएको जिल्ला प्रहरी कार्यालय पाँचथरका प्रहरी निरीक्षक तथा सूचना अधिकारी डम्बर विश्वकर्माले जानकारी दिए।
तिहारमा पड्काइएको पटकाबाट आगलागी सुरु भएको थियो। स्थानीय प्रहरी चौकी गोपेटारबाट गएको टोलीले चार घण्टापछि आगो निभायएको प्रहरी निरीक्षक विश्वकर्माले बताए।
यस्तै आज बिहान विद्युत सर्ट भएर आगो लाग्दा पाँचथरको मिक्लाजुङ गाउँपालिका ६ मेवाखोलामा धनराज लिम्बूको घरमा आगलागी भएको छ। आगलागीबाट घर पूर्णरूपमा जलेर नष्ट भएको छ।
आगलागीबाट घरमा भएको अन्नपात, लत्ताकपडा, पाँच तोला चाँदी, १० हजार नगदसहित घर पूर्णरूपमा जलेर नष्ट हुँदा तीन लाख ५० हजार बराबरको क्षति भएको प्रहरीले जनाएको छ।
इलाका प्रहरी कार्यालय रविबाट खटिएको प्रहरी टोली र स्थानीयवासीको सक्रियतामा दुई घण्टापछि आगो निभाइएको थियो।