नेपाल मेडिकल काउन्सिलको निर्वाचन आगामी मंसिरमा

काठमाडौं- नेपाल मेडिकल काउन्सिलको निर्वाचन आगामी मंसिरमा हुने भएको छ। काउन्सिल निर्वाचन समितिका अनुसार निर्वाचन दुई चरणमा हुनेछ। 

काठमाडौं उपत्यका र उपत्याकाबाहिर गरी दुई चरणमा मतदानम हुने जनाइएको छ। काउन्सिलले उपाध्यक्ष पदमा एक जना र सदस्य पदमा ८ जनाको निर्वाचन गर्न लागेको हो। 

निर्वाचन समितिले सार्वजनिक गरेको निर्वाचन कार्यतालिका अनुसार उपत्यकामा मंसिर १० र ११ गते हुनेछ भने उपत्यकाबाहिर मंसिर ३ र ४ गते हुनेछ। निर्वाचनका लागि असोज २२ गते मतदाता नामावली प्रकाशन हुनेछ। असोज २४ गते मतदाता नामावलीमा दाबी विरोध गर्ने समय तोकिएको छ। 

उपाध्यक्ष पदका लागि कम्तीमा १५ वर्ष र सदस्य पदका लागि कम्तिमा ५ वर्षको अनुभव भएका र काउन्सिलमा दर्ता भएका चिकित्सक हुनुपर्नेछ। यसरी निर्वाचित उपाध्यक्ष तथा सदस्यको कार्यकाल ४ वर्षको हुनेछ।