कोरोना संक्रमित कैलालीका एसपीलाई थप उपचारका लागि काठमाडौं ल्याइँदै

काठमाडौं– कोरोना भाइरस (कोभिड–१९)बाट संक्रमित भएका जिल्ला प्रहरी कार्यालय कैलालीका प्रहरी उपरीक्षक (एसपी)लाई थप उपचारका लागि काठमाडौं ल्याइँदैछ।

केही दिनअघि कोरोना पुष्टि भएका कैलालीका एसपी अनुप शमशेर राणालाई थप उपचारका लागि काठमाडौं ल्याउन लागिएको हो। संक्रमित भएपछि उनको कैलालीको धनगढीस्थित प्रादेशिक अस्पतालमा उपचार भइरहेको थियो।

उनलाई श्वासप्रश्वासमा समस्या देखिएपछि उपचारका लागि काठमाडौं पठाइएको सुदूरपश्चिम प्रदेश प्रहरी कार्यालयले जनाएको छ।

‘आज बिहान एम्बुलेन्समा राखेर काठमाडौं पठाइएको छ,’ सुदूरपश्चिम प्रदेश प्रहरी कार्यालयका प्रवक्ता एसएसपी मुकेश कुमार सिंहले भने, ‘उहाँलाई लक्षणसमेत देखिएर स्वास्थ्यमा समस्या देखिएको छ।’