काठमाडौं- श्रीमतीको हत्या गरेको अभियोगमा खोटाङमा एक जना पक्राउ परेका छन्।
४१ वर्षीया श्रीमती ज्ञान कुमारी गिरीको हत्या गरेको अभियोगमा दिक्तेल रुपाकोट मझुवागढी नगरपालिका २ तालखर्क बस्ने छत्र बहादुर गिरीलाई प्रहरीले आज (शनिबार) पक्राउ गरेको हो।
सामान्य घरायसी बिवादमा शुक्रबार बिहान छत्र बहादुरले लोहोरो प्रहार गर्दा गम्भीर घाइते भएकी ज्ञान कुमारीको जिल्ला अस्पतालमा सामान्य उपचारपश्चात थप उपचारको लागि काठमाडौंतर्फ ल्याउने क्रममा बाटोमै मृत्यु भएको हो।
घटनापछि फरार भएका छत्र बहादुरलाई अस्थायी प्रहरी चौकी तालखर्कबाट खटिएको प्रहरीले पक्राउ गरेको छ। उनलाई हिरासतमा राखेर थप अनुसन्धान भइरहेको प्रहरीले जनाएको छ।