राखेपमा ११ जना सदस्य नियुक्त

काठमाडौं- मन्त्रीपरिषद्को शुक्रबार बसेको बैठकले राष्ट्रिय खेलकुद परिषद् (राखेप) मा ९ सदस्य नियुक्त गरेको छ।

साथै राखेपको सिफारिसमा युवा तथा खेलकुद मन्त्री जगत बहादुर विश्वकर्माले दुई महिला सदस्यको नियुक्ति गरेको मन्त्रालयले जानकारी दिएको छ।

राष्ट्रिय खेलकुद विकास ऐनको दफा ३ को उपदफा २ (ट) अनुसार सरकारले देशको खेलकुद विकासमा महत्वपूर्ण योगदान दिएका प्रतिष्ठित व्यक्ति, राष्ट्रिय र अन्तराष्ट्रिय पूर्व खेलाडीमध्ये सबै प्रदेशबाट प्रतिनिधित्व हुनेगरी आदिवासी, जनजाति, दलित, खस आर्य, मुस्लिम, मधेसी, थारु र पिछडिएको क्षेत्रबाट तीन महिलासहित सदस्यहरु मनोनयन गर्ने व्यवस्था छ।

नियुक्त हुनेमा हरि खड्का, मानदेव हजारा, पुरेन्द्रविक्रम लाखे, राजेश गुरुङ, मोहम्मद सागिर शेख, नन्दा बस्याल, एकेन्द्र कुँवर, चन्द्र बदना राई र सुमित्रा चौधरी रहेका छन्। नन्दा बस्याल, चन्द्र बदना राई र सुमित्रा चौधरी महिलाबाट मनोनयन भएका हुन्।

त्यस्तै, खेलकुद संघबाट आएको महिला कोटामा रेनुका श्रेष्ठ र सुवर्णा श्रेष्ठ पनि राखेपको सदस्यमा नियुक्त भएका छन्।

परिषद् समिति ३७ जनाको हुनेमा यसअघि पनि राखेपका अध्यक्ष एवम् खेलकुद मन्त्री विश्वकर्माले ६ जना नियुक्त गरिसकेका छन्। अब राखेपको कार्यकारी समितिले पनि पूर्णता पाउने भएको छ।