काठमाडौं- चिकित्सा क्षेत्रको सुधारको माग राख्दै २७ दिनदेखि अनसनरत डा गोविन्द केसीका मागबारे प्रधानमन्त्री केपी ओलीसँग छलफल गर्न शिक्षामन्त्री गिरिराजमणी पोखरेल बालुवाटर पुगेका छन्।
अनशनरत डा गोविन्द केसी पक्षको वार्ता टोली र सरकारी वार्ता टोलीबीच शुक्रबार अवेरसम्म वार्ता हुँदा पनि निस्कर्ष ननिस्किएपछि मन्त्री पोखरेल सरकारी वार्ता टोली लिएर बालुवाटर पुगेको स्रोतले बतायो।
२७ देखि अनशनरत डा केसीको स्वास्थ्य अवस्था नाजुक हुँदै गएका बेला वार्तामा छलछाम गरी सरकारले सत्याग्रहीप्रति अमानवीय व्यवहार देखाएको केसी पक्षका वार्ता टोलीका संयोजक डा जीवन क्षत्रीले पत्रकार सम्मेलनमै बताइसकेका छन्।
यता सोलिडारिटी फर डा केसी अलायन्सले काठमाडौंको माइतीघरसहित मुलुकमा विभिन्न ठाउँमा प्रदर्शन थालिसकेको छ।
चिकित्सा शिक्षासँग जोडिएका विभिन्न माग राखेर २७ दिनदेखि अनशनरत डा। गोविन्द केसीको अनशन तोडाउन निर्णायक भनिएको वार्ता शुक्रबार पनि सम्झौता नभई टुंगिएको थियो।
सरकारले शिक्षा सचिव गोपीनाथ मैनालीको नेतृत्वमा तीन सदस्यीय वार्ता टोली गठन गरेको छ। वार्ताका लागि डा। केसीका तर्फबाट डा जीवन क्षेत्रीको संयोजकत्वमा चार सदस्यीय वार्ता टोली बनेको छ। यी दुई वार्ता टोलीबीच बिहीबार करिब १२ घन्टा भएको वार्ता सहमति नजिक पगेपनि शुक्रबार अबेर रातिको वार्ता भने विना निश्कर्ष टुंगिएको थियो।