काठमाडौँ- स्वास्थ्य सेवा सुधारको माग गर्दै २१ दिनदेखि अनसनमा बस्दै आएका डाक्टर गोविन्द केसीको समर्थनमा आवासीय चिकित्सकहरु आन्दोलित भएका छन् ।
वीपी कोइराला स्वास्थ्य विज्ञान प्रतिष्ठान, वीर अस्पताल र त्रिवि शिक्षण अस्पतालका आवासीय चिकित्सकहरु आन्दोलनमा उत्रिएका हुन् ।
उनीहरुले डा केसीको जीवनरक्षा र उनका माग पूरा गर्न दबाब दिन आज (आइतबार)देखि दैनिक दुई घण्टा इमर्जेन्सी र कोभिड उपचारबाहेकका सेवा ठप्प बनाएका छन् ।
उनीहरूले २४ घण्टाभित्र सरकारले वार्ता टोली गठन गरी डा केसीको जीवन रक्षाका लागि पहल नगरेमा थप कडा कार्यक्रम ल्याउन बाध्य हुने चेतावनी पनि दिएका छन् ।
भदौं २९ गतेबाट १९ औं अनसन सुरु गरेका डाक्टर केसीको स्वास्थ्य अवस्था जटिल बन्दै गएको चिकित्सकहरुले बताएका छन् ।
जुम्लाबाट अनसन सुरु गरेका उनलाई स्वास्थ्यमा समस्या देखिएपछि काठमाडौं ल्याइएको थियो । उनी हाल त्रिवि शिक्षण अस्पताल, महाराजगञ्जमा छन् ।
२१ दिनदेखि अनसनरत रहेका डा केसीको माग सम्बोधन गर्न सरकारले चासो देखाएको छैन् । शिक्षा र स्वास्थ्य मन्त्रालय आफ्नो जिम्मेबारीबाट पन्छिराखेको छ ।