बलात्कार घटनामा मेलमिलाप गराउने पनि अपराधी हुन् : सांसद ढकाल

काठमाडौं– जनता समाजवादी पार्टीकी नेतृ एवं संघीय सांसद प्रज्ञा ढकालले बलात्कार जस्तो जघन्य अपराधमा मेलमिलाप गराउने पनि उत्तिकै अपराधी भएको बताएकी छिन्। 

उनले केही दिन अघि बझाङमा १२ वर्षीया बालिका सम्झना विकको बलात्कारपछि नृसंश हत्या भएको विषय उठाउँदै भनेकी छिन्, ‘बलात्कारमा संलग्न व्यक्तिलाई साधारण मिलापत्र गरेर छाडिदिँदा सम्झनाको ज्यान गयो। बलात्कारी मात्र होइन यस्तो जघन्य अपराधमा पनि मेलमिलाप गराएर दोषी चोख्याउने पनि अपराधी हुन्।’

सामाजिक सञ्जालमार्फत आफ्नो धारणा सार्वजनिक गर्दै उनले गृहमन्त्री रामबहादुर थापाप्रति पनि आक्रोश पोखेकी छिन। ‘दैनिकजसो बलात्कारका घटना भइरहँदा पनि गृहमन्त्री यो सामान्य हो भनिरहनुभएको छ,’ उनले भनेकी छिन्, ‘गृहमन्त्रीको त्यस्तो भनाइ र सरकारको निरिहताप्रति देख व्यक्त गर्छु।’

उनले कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको दुई वर्ष बितेको र  अहिले पनि ती हत्याराहरू खुलमखुल्ला हिँडिरहँदा पनि पक्राउ नगरेर सरकारले निरिहता प्रदर्शन गरेको पनि दावी गरेकी छिन्।