धनगढी- सुदूरपश्चिम प्रदेशमा कोभिड-१९ का संक्रिय संक्रमित करिब १२ सय पुगेको छ ।
स्वास्थ्य निर्देशनालय डोटीका अनुसार सुदूरपश्चिम प्रदेशमा कोभिड–१९ का संक्रिय संक्रमित १ हजार १ सय ९३ पुगेको छ ।
सुदूरपश्चिम प्रदेशका नौं जिल्लामध्ये कैलालीमा मात्रै कोभिड–१९ का संक्रिय संक्रमित ६५७ पुगेको छ ।
स्वास्थ्य निर्देशनालयका अनुसार डोटीमा १३४, बझाङमा १११, अछाममा १००, बैतडीमा ८५, कंचनपुरमा ६३, दार्चुलामा ३० र डडेल्धुरामा १२ जना र अन्य जिल्लाका एक जना जना संक्रिय संक्रमित रहेका छन् ।
बाजुरा जिल्लामा भने कोरोनाको संक्रिय संक्रमित शून्य रहेको स्वास्थ्य निर्देशनालयले जनाएको छ।
६ हजार एक सय बढीले कोभिड-१९ जिते
सुदूरपश्चिम प्रदेशमा हालसम्म ६ हजार एक सय बढी कोभिड–१९ संक्रमित निको भएका छन् ।
स्वास्थ्य निर्देशनालय डोटीका अनुसार हालसम्म प्रदेशमा सात हजार तीन सय ४५ जनामा कोभिड–१९ पोजेटिभ आएकोमा ६ हजार एक सय ३६ जना निको भएका छन् ।
प्रदेश स्वास्थ्य निर्देशनालयका अनुसार हालसम्म सबैभन्दा बढी कोभिड–१९ संक्रमित रहेको कैलाली जिल्लाबाट १८७२ जना कोभिड–१९ जितेर घर फर्किएका छन् ।
बाजुरा जिल्लामा ४५३ जनामा कोभिड–१९ संक्रमण पुष्टि भएकोमा ४५१ जनाले कोभिड–१९ जितेर घर फर्किएका छन् भने दुई जनाको मृत्यु भएको छ ।
बाजुरा जिल्लामा कोभिड–१९ का संक्रिय संक्रमित अहिले शून्य रहेको छ । अछामका ९६९, डोटीका ९६० र कञ्चनपुरका ७४७, बझाङका ४३१, बैतडीका ३३१, डडेल्धुराका ३२४ र दार्चुलाका ५१ जना कोभिड–१९ जितेर घर फर्किएको निर्देशनालयले जनाएको छ ।