पर्सा - बाराकाे जितपुरसिमरा उपमहानगरपालिका- १ मा आइतबार साँझ स्कुटरलाई ठक्कर दिँदा एकै परिवारका तीन जनाको मृत्यु भएको छ।
पथलैया निजगढ सडक खण्डको दुधौरा पुल नजिकै निजगढबाट पथलैयातर्फ गुडिरहेको ना४ख ७२४४ को बसले प्रदेश नं २-०३-००४ प ४४४२ नम्बरको स्कुटरलाई ठक्कर दिएको हो।
ठक्करबाट स्कुटर चालक बाराकै निजगढ नगरपालिका-१० लालगाउँका २५ वर्षीय तीर्थमान स्याङ्तान, उनकी २२ वर्षीया पत्नी ज्योति स्याङ्तान र नाम नखुलेको उनका १ वर्षीय छोराको मृत्यु भएको प्रहरीले जनाएको छ।
बस चालक फरार भएकाले खोजी भइरहेको छ। दुर्घटनामा परेको गाडी प्रहरी नियन्त्रणमा रहेको बताइएको छ। दुर्घटनाका कारणबारे अनुसन्धान भइरहेको बाराका प्रहरी नायब निरीक्षक गौतम मिश्रले बताए।