विराटनगर– विराट शिक्षण अस्पताल बुढीगंगाको आइसोलेनमा झापाको भद्रपुर १० घर भएका कोरोना संक्रमित एक पुरुषको मृत्यु भएको छ ।
८६ वर्षीय पुरुषको उपचारका क्रममा बुधबार बिहान ५ः५० बजे मृत्यु भएको अस्पतालका प्रशासन प्रमुख सुधीरसिंह राठौरले जानकारी दिए ।
कोरोनासँग मिल्दो जुल्दो लक्षण देखिएका उनलाई भदौ ३ गते उपचारका लागि आईसीयूूमा भर्ना गरिएको थियो।
त्यही दिन स्वाब संकलन गरेर परीक्षणका लागि पठाउँदा ५ गते सोमबार रिपोर्ट पोजेटिभ आएको अस्पतालको आइसोलेसनका प्रमुख डा. पुरु कोइरालाले बताए ।
उनलाई उपचारका लागि भर्ना गर्दा ज्वरो, जटिल खालको नियमोनिया, श्वासप्रश्वास तथा मृगौला सम्बन्धी समस्या रहेको जानकारी डा. कोइरालाले दिए।
अस्पतालले मृतकको शव नियमअनुसार व्यवस्थापन गरिने जनाएको छ ।