पाल्पा- पाल्पाको तानसेन नगरपालिकामा रहेको वृद्धाश्रममा एक कोरोना संक्रमितको मृत्यु भएको छ ।
नगरपालिका र मिसन अस्पतालले सञ्चालन गरेको वृद्धाश्रम आइसोलेसनमा उपचाररत ५२ वर्षीय कोरोना संक्रमित पुरुषको आज (बिहीबार) बिहान मृत्यु भएको हो ।
शंकास्पद लक्षण देखिएपछि उनको कोरोना परिक्षण गरिएको थियो । चार दिनअघि उनमा कोरोना पुष्टि भएको हो ।
कलेजोको समेत बिरामी भएका उनलाई कोरोना संक्रमण देखिएपछि थप उपचारका लागि बुटवल र भैरहवाका विभिन्न अस्पताल लगिए पनि भर्ना लिएका थिएनन् ।
त्यसपछि उनलाई मंगलबार पुनः तानसेनकै वृद्धाश्रम ल्याएर उपचार गरिएको मिसन अस्पतालले जनाएको छ ।
कोरोना संक्रमित बिरामीलाई उपचार गर्न तोकेका अस्पतालले बिरामी राख्न नमान्दा उनको मृत्यु भएको भन्दै स्थानीयले आक्रोश ब्यक्त गरेका छन् ।