काठमाडौं– बाराका पत्रकार वीरेन्द्र साहको अपहरण तथा हत्यामा संलग्न मुख्य अभियुक्तलाई बारा प्रहरीले १३ वर्षपछि पक्राउ गरेको छ।
अदालतबाट वारेन्ट जारी भई १३ वर्षदेखि फरार रहेका हरेराम पटेल भन्ने हरेराम प्रसाद कुर्मीलाई आज दिउँसो प्रहरीले पक्राउ गरेको हो।
बाराको विभिन्न स्थानमा लुकिछिपि बसेको कुरा प्राविधिक अनुसन्धान तथा विशेष सुराकीको आधारमा जिल्ला प्रहरी कार्यालय बाराबाट खटिएको प्रहरी टोलीले कोल्हवी नगरपालिका ४ सपही टोलमा लुकिछिपि बसेको अवस्थामा पक्राउ गरेको हो। अहिले उनलाई जिल्ला प्रहरी कार्यालयमा ल्याइँदैछ। आवश्यक प्रकृया पुर्याई बारा जिल्ला अदालतमा पेश गरिने जिल्ला प्रहरी कार्यालय बाराले जनाएको छ।
१८ असोज २०६४ मा पत्रकार वीरेन्द्र साहलाई हरेराम पटेल भन्ने हरेराम प्रसाद कुर्मी, कुन्दन फौजदार, राम एकवाल सहनी र मनेजर गिरि समेतका ५ जना व्यक्तिहरूले अपरहण गरी लगेर गोली हानी हत्या गरेका थिए।
शाहको शव बारा गाविसको डुमरवाना ७ स्थित जंगलमा खाल्टो खनी गाडेको अवस्थामा २२ कात्तिक २०६४ मा फेला परेको थियो।
अपहरण र हत्यामा संलग्न प्रतिवादी मनेजर गिरी, राम एकवाल सहनी, नरेन्द्र फौजदार यसअघि नै पक्राउ परिसकेका थिए। उनीहरु सबैलाई सर्वस्व सहित जन्मकैदको सजाय भएको थियो।