काठमाडौं- एक गोलले पछि परेको अवस्थामा यूईइफए नेसन्स लिगको मंगलबार राति सम्पन्न खेलमा फ्रान्सले क्रोएसियाविरुद्ध नाटकिय जित निकालेको छ।
स्टेडे डि फ्रान्समा सम्पन्न खेलमा घरेलु टिमले क्रोएसियाविरुद्ध ४–२ गोलअन्तरले जित निकालेको हो।
जितका लागि एन्टोनी ग्रिजम्यान, डेयोट उपमेकानो र ओलिभर जिराउडले १–१ गोल गरे भने क्रोएसियाका डोमिनिक लिवाकोविकले आत्मघाती गोल गरे।
खेलको १६ औं मिनेटमै डिजेन लोवरेनले गोल गर्दै क्रोएसियालाई सुरुवाती अग्रता दिलाएका थिए।
एक गोलले लामो समय पछि परेको फ्रान्सका तर्फबाट ४३ औं मिनेटमा ग्रिजम्यानले गोल गर्दै खेललाई बराबरीमा ल्याए। तर लगत्तै, पहिलो हाफको अतिरिक्त समयमा विवाकोभिकले आत्मघाती गोल गर्दै फ्रान्सलाई गोल कोसेली दिए।
योसँगै पहिलो हाफमा फ्रान्स २–१ गोलले अघि रह्यो। दोस्रो हाफमा पनि गोल स्कोरिङ क्रोएसियाले नै अघि बढायो। ५५ औं मिनेटमा जोसिप ब्रेकालोले गोल गर्दै खेललाई बराबरीमा ल्याए तापनि ६५ औं मिनेटमा उपमेकानोले फ्रान्सलाई पुनः अग्रता दिलाए।
७७ औं मिनेटमा जिराउडले पेनाल्टीमा पाएको अवसरको सदुपयोग गर्दै गोल गरेपछि फ्रान्सले ४–२ गोल अन्तको जित निश्चित गर्यो।
जितसहित ६ अंक बनाएको फ्रान्स लिग ए, समूह ३ को दोस्रो स्थानमा कायम छ। यता पराजित क्रोएसियाल भने अंकविहिन रहँदै समूहको पुछारमा छ।