काठमाडौं– ललिता निवास प्रकरणमा धरौटीमा रिहा भएका कांग्रेस उपसभापति विजयकुमार गच्छदारले अदालत प्रधानमन्त्रीको निर्देशनमा नचल्ने बताएका छन्।
गत असार २९ गते कांग्रेस सभापति शेरबहादुर देउवा प्रधानमन्त्री भएको भोलिपल्ट १० लाख धरौटीमा रिहा भएका गच्छदारले अदालतले आफूलाई न्याय दिएको बताएका हुन्।
उनले देउवा प्रधानमन्त्री हुनु र आफ्नो मुद्दामा अदालतले आदेश दिनुका बीचमा कुनै साइनो नभएको बताए। उनले अदालतको आदेश र देउवाको नियुक्तिलाई दिएर ‘काग कराउनु र चल्ला हराउनु’ जस्तो मात्रै भएको बताए।
‘लकडाउनका कारण लामो समयदेखि अदालत बन्द थियो। त्यसले गर्दा मुद्दा पछि सर्यो। बीचमा म पारिवारिक वियोगबाट गुज्रनुपर्यो। त्यसैले अदालतमा उपस्थित हुन सकिनँ,’ उनले भने, ‘प्रधानमन्त्रीको निर्देशनबाट अदातल चल्दैन। एकै छिनमा हुँदैन नि। महिनौं दिनदेखिको तयारी हो। काग कराउनु र चल्ला हराउनु भएजस्तो मात्रै हो,’ उनले भने, ‘देउवा प्रधानमन्त्री बनेपछि म छुटेको भन्ने हुँदै होइन। प्रधानमन्त्रीको निर्देशन अनुसार अदालत चल्ने हो भने त पहिलै नै प्रतिशोध साँधिएको थियो नि त।अदालतले मलाई न्याय दिएको छ। म अब खुलेआम रुपमा जनतामाझ आफ्ना कुरा राख्छु। म कानुनी राज्यको लागि लडेको व्यक्ति हो। म निर्दोष प्रमाणित हुन्छु भन्ने मलाई विश्वास छ।’
ललिता निवास प्रकरणको विषयमा आज (बुधबार) उनले पत्रकार सम्मेलन आयोजना गरेका थिए।