काठमाडौं– कोरोना भाइरस संक्रमण दर बढ्दै गएपछि बाँकेको खजुरा गाउँपालिका क्षेत्रभित्र ५ दिनका लागि निषेध आदेश जारी गरिएको छ।
गाउँपालिकाको आग्रहमा जिल्ला प्रशासन कार्यलय बाँकेले सोमबार राति १२ बजेदेखि २७ गते राति १२ बजेसम्मका लागि निषेध आदेश जारी गरेको हो।
खजुरा गाउँ कार्यपालिकाको आइतबार बसेको बैठकको निर्णयका आधारमा निषेध आदेश जारी गरिएको बाँकेका प्रमुख जिल्ला अधिकारी रामबहादुर कुरुम्वाङले जानकारी दिए।
नेपालगन्ज–गुलरिया सडक खण्डको कपास विकास समितिदेखि वीपी प्रतिक्षालयसम्म र सो सडकको दायाँबायाँ ५ सय मिटरसम्म पर्ने सबै वडामा लागु हुने गरी निषेध आदेश जारी गरिएको छ।
स्वास्थ्य, शान्ति सुरक्षा, विद्युत, दुरसञ्चार, खानेपानी, फोहोरमैला व्यवस्थापन, ग्यास, औषधि पसल, पेट्रोलियम पदार्थ, एटिए, हेरी जस्ता अत्यावश्य सेवा भने खुल्ला नै रहने प्रशासनले जनाएको छ। यस्तै अत्यावश्यक सेवाका सवारीसाधन पनि सञ्चालन गर्न पाइने प्रशासनले जनाएको छ।
त्यसबाहेक निषेध आदेश उल्लंघन गर्नेलाई संक्रामण रोग ऐन २०२० तथा स्थानीय प्रशासन ऐन २०२८ अनुसार कारवाही गरिने प्रशासनले जनाएको छ।