विराटनगर–प्रदेश १ मा कोरोना संक्रमितको संख्या ४ हजार नाघेको छ।
पछिल्लो २४ घण्टामा १४३ जना संक्रमित थपिएसँगै संक्रमितको संख्या ४ हजार २२ पुगेको छ। आइतबार सुनसरीमा ७८, मोरङमा २९, झापामा २८, संखुवासभामा ६, उदयपुर र प्रदेश १ बाहिरका १–१ जना रहेको सामाजिक विकास मन्त्रालयले जनाएको छ।
मन्त्रालयका अनुसार सुनसरीको धरानमा ७१ जनामा संक्रमण देखिएको छ। एक महिला र ७० पुरुषको रिपोर्ट पोजेटिभ आएको छ।
इटहरीमा ५ महिला र २ पुरुष, मोरङको विराटनगरमा ९ महिला १६ पुरुष, सुनबर्षीमा २ पुरुष, जहदा र बुढीगंगामा १–१ महिला संक्रमित भएका छन्।
झापाको बिर्तामोडमा ८ महिला २ पुरुष, कमल गाउँपालिकामा ३ महिला ७ पुरुष, मेचीनगरमा २ महिला ४ पुरुष, अर्जुनधारा र स्थानीय तह नखुलेका १–१ महिलामा कोरोना संक्रमण देखिएको सामाजिक विकास मन्त्रालयले जनाएको छ।
संखुवासभाको खाँदबारीमा ३, चैनपुरमा २ र चिचिलामा १ पुरुष, उदयपुरको त्रियुगामा १ पुरुष र प्रदेश १ बाहिर एक महिलाको रिपोर्ट पोजेटिभ आएको मन्त्रालयले जनाएको छ।
पछिल्लो २४ घण्टामा प्रदेश १ मा थप २ जनाको मृत्यु भएको छ। झापाकी १ महिला र विराटनगरका १ पुरुषको मृत्यु भएको छ। प्रदेश १ मा मृत्यु हुनेको संख्या ४१ पुगेको छ।
प्रदेश १ मा आइतबार ७ जना डिस्चार्ज भएका छन्। उनीहरु सवै बीपी कोइराला स्वास्थ्य विज्ञान प्रतिष्ठान धरानबाट डिस्चार्ज भएका हुन। प्रदेश १ मा डिस्चार्ज हुनेको संख्या १ हजार ८४३ पुगेको छ।
प्रदेश १ मा आइतबार १ हजार २६७ जनाको पीसीआर परीक्षण गरिएको छ। परीक्षण गरिएका मध्ये ३१ महिला र ११२ पुरुषको रिपोर्ट पोजेटिभ आएको सामाजिक विकास मन्त्रालयले जनाएको छ।
मन्त्रालयका अनुसार हाल सम्म ९८ हजार ४८८ जनाको पीसीआर परीक्षण गरिएको छ।