बुटवलमा कोरोनाबाट थप एक महिलाको मृत्यु

बुटवल- कोरोना भाइरसको संक्रमणबाट बुटवलस्थित गौतम बुद्ध सामुदायिक मुटु अस्पतालमा थप एक महिलाको मृत्यु भएको छ ।

रुपन्देहीको सिद्धार्थनगर नगरपालिका–७ का ६४ वर्षीया महिलाको आज (शुक्रबार) बिहान मृत्यु भएको हो ।

भदौ ४ गते उच्च रक्तचाप, मधुमेह, मिर्गौला रोग र निमोनिया देखिएपछि उनी अस्पताल भर्ना भएकी थिइन् ।

उनलाई भर्ना भएकै दिनदेखि आईसीयूमा राखेर उपचार गरिएको थियो । उनको १५ गते स्वाब संकलन गरी पठाइएकोमा १६ गते कोरोना पोजिटिभ देखिएको थियो ।

उनको शुक्रबार बिहान ८ः४५ बजे उपचारका क्रममा मृत्यु भएको अस्पतालले जनाएको छ ।

यसअघि मुटु अस्पतालमा बिहीबार प्यूठानका एक जना कोरोना संक्रमितको मृत्यु भएको थियो ।