बारामा कोरोना संक्रमित एक जनाको मृत्यु

पर्सा- कोरोना भाइरस संक्रमणबाट बारामा थप एक जनाको मृत्यु भएको छ। सिमरौनगढ नगरपालिका ९ बाराका ९७ वर्षीय पुरुषको उपचारका क्रममा मंगलबार राति मृत्यु भएको हो।

उनलाई भदौ १२ गते तराई हस्पिटलमा भर्ना गरिएको थियो। स्वास्थ्य अवस्था जटिल बन्दै गएपछि आइतबार गण्डक हस्पिटलमा भर्ना गरी थप उपचार गरिएको थियो।

उपचारमा संलग्न चिकित्सक डा. निरज सिंहका अनुसार मुटुरोगी ती वृद्धको शरीरमा सोडियमको मात्रा कम थियो भने निमोनियाका लक्षणसमेत थियो।
योसँगै बारामा कोरोना संक्रमणबाट मृत्यु हुनेको संख्या १७ पुगेको छ। बारामा नौ सय १७ जनामा कोरोना संक्रमण भएको छ।