कोरोनाबाट वीरगन्जमा थप ३ जनाको मृत्यु

वीरगन्ज- कोरोना भाइरसको संक्रमणबाट पर्साको वीरगन्जमा थप ३ जनाको मृत्यु भएको छ ।

मृतकहरु बारा कोल्भीकी एक ६० वर्षीय महिला, पर्सा वीरगन्ज महानगरपालिका वडा नम्बर २० हरपतगंजका ५३ वर्षिय एक पुरुष र पहिचान खुल्न नसकेका ६० वर्षिय एक पुरुष रहेका छन् ।

वीरगन्ज हरपतगंजका ५३ वर्षिय पुरुष साउन ३१ गते वीरगंज हेल्थ केयर हस्पिटलमा भर्ना गरिएको उनको उपचारको क्रममा सोमबार राति मृत्यु भएको हो ।

उनमा मधुमेहको साथै श्वासप्रस्वासको समस्याले उपचारको क्रममा मृत्यु भएको नारायणी अस्पतालका प्रवक्ता चिकित्सक डा चितरञ्जन साहले बताए ।

यसैगरी सोमबार राती नै पहिचान खुल्न नसकेका ६० वर्षिय एक पुरुषको मृत्यु भएको हो ।

मृत्युपछि उनको जीन एक्सपोर्ट विधिबाट परिक्षण गर्दा कोरोना पोजेटिभ देखिएको डा साहको भनाई छ ।

सोमबार साँझ नारायणी अस्पतालको अकास्मिक कक्षमा उपचारका लागी आएका उनको उपचारकै क्रममा मृत्यु भएको हो ।

यसैगरी कोरानाकै कारण बारा जिल्लाको कोल्भीकी ६० वषीया महिलाको मंगलबार बिहान मृत्यु भएको छ ।

उपचारका लागी कोभिड अस्पताल गण्डकमा भर्ना गरिएको उनको आज विहानै मृत्यु भएको नारायणी अस्पतालले जनाएको छ ।

कोरोना संक्रमित रहेका उनमा समेत श्वासप्रस्वासको समस्या रहेको चिकित्सक डा चितरञ्जन साहले बताए ।

हालसम्म पर्सामा ३९ जनाको मृत्यु भएको छ ।