भैरहवा– १३ वर्षे छोरा जीवनको उपचारका लागि प्युठानका कर्णबहादुर पुन अहिले भैरहवामा छन्। छोराका दुवै खुट्टा भाँच्चिएपछि कर्णबहादुर कोरोनाको जोखिमलाई बेवास्ता गर्दै प्युठानको फोप्लीदेखि भैरहवा आइपुगेका हुन्।
जसोतसो भैरहवा त झरे, तर उनीसँग छोराको उपचारको लागि पैसा छैन। अपरेसन खर्च जुटाउन नसकेपछि उनी आँखाभरि आँसु लिएर सहयोगको याचना गर्दै हिँडिरहेका छन् ।
भैरहवास्थित युनिभर्सल कलेज अफ मेडिकल साइन्सेज शिक्षण अस्पालतमा उपचारत छोरा जीवनको जीवन बचाउने प्रयासमा लागेका उनले भने, ‘साउन ३० गते छोरालाई लिएर आएको हुँ । डाक्टरले चार लाख जति पैसा लाग्छ भनेका छन्। आफूसँग पैसा छैन। घरमा बेच्ने पनि केही छैन । जग्गा जमिन घरबारी सानो टुक्रो छ । सबै बेच्दा पनि चार लाख आउँदैन । ४० हजार लिएर आएको थिएँ, सबै सकियो । अहिले उधारो उपचार भइरहेको छ । अपरेसनको लागि धेरै पैसा लाग्ने भयो, कसरी जुटाउने होला ?’
खेतीकिसानी गरेर जीविकोपार्जन गरिरहेका कर्णबहादुर छोराको जीवन बचाइदिन सहयोगी हातको पर्खाइमा छन्। प्युठानको नौबहिनी गाउँपालिका–८ फोप्ली गैराथोक घर भएका कर्णबहादुरका छोरा र १० वर्षकी छोरी छन् ।
स्थानीय नेपाल राष्ट्रिय आधारभूत विद्यालयमा कक्षा ७ मा पढ्दै गरेका जीवन आफ्ना बाबुसँगै साउन ३० गते बिहान बहाने बजार जाँदै थिए । टिम्ले खोलाको लम्पुक भीरमा हिँड्दै गर्दा माथिबाट खसेको ढुंगाले च्याप्दा जीवनको दुवै खुट्टा भाँच्चिएको हो ।
सुरुमा आईसियुमा राखेर उपचार गरिएको जीवनको स्वास्थ्यमा सामान्य सुधार भएपछि हाल वार्डमा राखेर उपचार भइरहेको युसिएमएस भैरहवाका प्रशासन प्रमुख तेजकुमार केसीले बताए। उनका अनुसार अस्पतालले जीवनको उपचारमा सक्दो सहयोग गरिरहेको छ ।
जीवनको उपचारमा डा. प्रकृतिराज कँडेल, डा. किशोरमान श्रेष्ठसहितको टोली संलग्न छ । चिकित्सकहरुका अनुसार ढुंगाले थिच्दा उनको खुट्टाको हड्डी सबै भाँचिएको छ । खुट्टाको हड्डी धेरै ठाउँमा भाँचिएकोले अपरेसन पनि गम्भीर हुन्छ । अस्पताल प्रशासनका अनुसार उनको उपचारको लागि करिब चार लाखको हाराहारीमा खर्च आउने देखिन्छ ।
जीवनको बुबा र उनको हेरचाहको लागि आएका अर्का एकजना आफन्तलाई यतिबेला पश्चिमेली सरु होटलले सहयोग गरिरहेको छ । होटलका सञ्चालक लिलाधर भट्टराईले भने, ‘मैले उहाँको आर्थिक अवस्था नाजुक रहेको बुझेपछि सकेको सहयोग गरिरहेको छु।’ बिरामीको उपचारमा आर्थिक समस्या देखिएपछि अस्पतालमा कार्यरत नर्सहरुले पनि रकम उठाएर सहयोग गरेका छन्।