बार्सिलोना– बार्सिलोनाका कप्तान लियोनेल मेस्सीले भर्खरै नियुक्त भएका प्रशिक्षक रोनाल्डो कोयमेनसँग कुरा गर्दै आफू क्लबमा बसिरहने कुराप्रति शंका व्यक्त गरेका छन्।
च्याम्पियन्स लिगमा बेभरियन क्लब बायर्नसँगको निराशाजनक हारका कारण बार्सिलोनाको कमजोरी छताछुल्ल भएको र अर्जेन्टिनी फुटबलरको भविष्य अन्योलपूर्ण भएको अड्कल काट्न थालिएको छ।
क्याटालान रेडियो आरएसी–१ का अनुसार अहिले मेस्सी बार्सिलोनामा बस्ने भन्दा पनि बाहिर कुन क्लबमा जान सही हुन्छ, त्यसको निर्णय कुरिरहेका छन्। तर, एक वर्षको सम्झौता बाँकी रहँदा नै क्लबबाट बाहिर जान गाह्रो हुन्छ भन्ने मेस्सीले बुझेका छन्।
यसैबीच बार्सिलोनाले भर्खरै नियुक्त गरेका प्रशिक्षक रोनाल्ड कोयमेनले कप्तान मेस्सीसँग कुरा गर्नुपर्ने बताएपछि समर बिदा बिचमै रोकेर उनी वार्तामा फर्किएका थिए।
कोयमेनसँगको पहिलो वार्तामा उनले नयाँ सिजनको लागि कुराकानी गरेका छन्। डच प्रशिक्षक कोयमेनका लागि २०२०–२१ को सिजनमा मेस्सी पिलरका रुपमा रहनेछन्, तर कोयमेनले भनिसकेका छन् कि उनलाई ‘ननकमिटेड प्लेयर’ आवश्यक छैनन। मेस्सी भने बाहिरिन खोजिरहेका छन्।
तरपनि बार्सिलोनाका लागि सबैभन्दा महत्वपूर्ण कुरा मेस्सीलाई क्लबमा टिकाउन सक्नु नै हो। अध्यक्ष जोसेप मारिया बर्टोमाउ यस्ता प्रशिक्षक बन्न चाहँदैनन्, जसको पालामा संसारकै उत्कृष्ट खेलाडीले क्लब छोडेर गए। यसले उनको आगामी चुनावमा निर्वाचित हुने सम्भावना घट्नेछ। तर, मेस्सी क्लबमा बस्ने अवस्थामा देखिँदैनन्।
पछिल्लो समय बार्सिलोनाले मेस्सीको मनस्थिति अध्ययन गरिरहेको छ। साथै उसले कोयमेनसँगको कुराकानीले मेस्सीलाई क्लबमा फर्काउने आशासमेत गरेको छ।
यता, सम्झौता एक वर्ष बाँकी रहेकाले क्लबको अुनमति विना मेस्सी अन्य क्लबमा जान सक्ने छैनन्। त्यसपमाथि उनको रिलिज शर्त ७०० मिलियन यूरो छ। इन्टर लगायतका क्लबले उनलाई अनुबन्धन गर्न खोजिरहे पनि ती क्लबले सो रकम तिर्न सक्ने छैनन्।
बार्सिलोनाका लागि एकमात्र समस्या यो हो कि उनको ठाउँमा राख्न सकिने खलाडी क्याटालान क्लबमा कोही पनि छैनन्।