बाँकेमा कोरोना संक्रमित वृद्धको मृत्यु

काठमाडौं- बाँकेमा कोरोना भाइरस संक्रमित वृद्धको मृत्यु भएको छ। स्वास्थ्य कार्यालय, बाँकेका अनुसार नेपालगन्ज उपमहानगरपालिका-५ का ६२ वर्षीय पुरुषको हिजो राति मृत्यु भएको हो।

स्वास्थ्यमा समस्या आएपछि उनी गत साउन ३२ गते नेपालगन्ज मेडिकल कलेजमा भर्ना भएका थिए। भर्नालगत्तै कोरोना संक्रमणको आशंकामा उनको पीसीआर परीक्षणका लागि स्वाब लिइएको थियो। उनलाई हिजो दिउँसो कोरोना संक्रमण पुष्टि भएको थियो। 

उनको दुवैतर्फको फोक्सोमा निमोनिया भएर मृत्यु भएको स्वास्थ्य कार्यालयले जनाएको छ।

योसँगै बाँकेमा मृत्यु हुने कोरोना संक्रमितको संख्या ४ पुगेको छ।