काठमाडौं- कोरोना भाइरस संक्रमणबाट नेपाली कांग्रेस नवलपरासी पश्चिमका जिल्ला उपसभापति सुवाशचन्द्र गिरीको मृत्यु भएको छ ।
ललितपुरको पाटन अस्पतालमा उपचाररत उपसभापति गिरीको आज (मंगलबार) बिहान मृत्यु भएको हो । ३८ वर्षीय गिरी नवलपरासी सुस्ता पश्चिमका स्थायी बासिन्दा हुन् ।
कोरोना संक्रमण देखिएपछि बुटवलको कोरोना अस्पतालबाट साउन ३० गते पाटन अस्पतालमा भर्ना भएका गिरीको भेन्टिलेटरको सहायतामा उपचार भइरहेको थियो ।
सोमबार राति ११ बजेदेखि स्वासप्रस्वासमा समस्या आएको उनको बिहान ६ बजेतिर मृत्यु भएको हो ।
गिरीको केही समयअघि युनिभर्सल मेडिकल कलेज भैरहवामा पित्तथैलीको पत्थरीको शल्यक्रिया भएको थियो । त्यसपछि स्वासप्रस्वासमा समस्या देखिएपछि मेडिकल कलेजमा पीसीआर परीक्षण गर्दा कोरोना पोजेटिभ देखिएको थियो ।
योसँगै सोमबार राति र मंगलबार बिहान गरेर ४ जनाको मृत्यु भएको छ । नेपालमा कोरोनाबाट मृत्यु हुनेको संख्या १ सय ११ पुगेको छ ।