पाँच स्वास्थ्यकर्मीमा कोरोना संक्रमण भएपछि कपिलवस्तु जिल्ला अस्पताल बन्द

भैरहवा– कपिलवस्तु सदरमुकाम तौलिहवामा रहेको जिल्ला अस्पतालमा कार्यरत पाँच स्वास्थ्यकर्मीमा कोरोना संक्रमण पुष्टि भएपछि अस्पतालको आकस्मिकबाहेक अन्य सेवा बन्द गरिएको छ।

अस्पतालका फाँट प्रमुख, चिकित्सक र सरोकारवालाहरुको बैठक निर्णयअनुसार सेवाग्राहीलाई संक्रमणको उच्च जोखिम रहेकाले स्वाब संकलन गरी पठाएपछिको रिपोर्ट नआउँदासम्म अस्पताल बन्द गरिएको जनाइएको छ।

अस्पतालका मेडिकल सुपरिन्टेन्डेन्ट डा. किशोर बन्जाडेले जारी गरेको विज्ञप्तिमा भनिएको छ, ‘अस्पतालका विभिन्न फाँटमा कार्यरत कर्मचारीमा कोरोना संक्रमण भएको छ। अस्पतालको अति आकस्मिक सेवाबाहेक अन्य सेवा बन्द रहने जानकारी गराइन्छ।’

सोही अस्पतालमा कार्यरत एक जना नर्स २ महिनाअघि संक्रमित भएकी थिइन्। अहिले नर्स, ल्याबका कर्मचारी, एक्सरे र ओपीडीमा काम गर्ने कर्मचारीमा संक्रमण पुष्टि भएको हो।