वीरगन्ज- पर्साको वीरगन्जमा कोरोना संक्रमणबाट थप एक जनाको मृत्यु भएको छ ।
वीरगन्ज महानगरपालिका–१५ भेडियाही बस्ने ४५ वर्षीया महिलाको कोरोनाकै कारण मृत्यु भएको पुष्टि भएको हो ।
उनको शनिबार राति नारायणी कोरोना विशेष अस्पताल गण्डकमा उपचारको क्रममा मृत्यु भएको थियो । मृत्युपछि आइतबार स्वाव संकलन गरेर गरिएको परिक्षणमा उनमा कोरोना पोजिटिभ देखिएको अस्पतालका संयोजक डाक्टर उदय नारायण सिंहले जानकारी दिए ।
पहिलेदेखि नै उच्च रक्तचाप र थाइराइडको समस्याबाट ग्रसित उनलाई श्वास प्रश्वासमा समस्या देखिएपछि उपचारका लागि अस्पताल ल्याइएको थियो । गम्भिर अवस्थामा अस्पताल ल्याइएकाले विरामीलाई बचाउन नसकिएको डा सिंह बताए ।
यो सँगै साउनमा मात्रै कोरोनाबाट ज्यान गुमाउनेको संख्या १८ पुगेको छ । देशभर अहिलेसम्म ७६ जनाको मृत्यु भएको छ । आइतबार २ जना, शनिबार ३ जना, शुक्रबार ५ जना र बिहीबार ५ जनाको कोरोनाकै कारण मृत्यु भएको थियो ।