मोरङका ९ स्थानीय तहमा लकडाउन

विराटनगर– कोरोना भाइरसको संक्रमण बढ्दै गएपछि मोरङका ९ वटा स्थानीय तहमा लकडाउन गरिएको छ ।

संक्रमणको अवस्था विश्लेषण गरी रोकथाम तथा नियन्त्रणका लागि स्थानीय तहले आवश्यक कदम चाल्न सक्ने प्रदेश सरकारले निर्णय गरेसँगै स्थानीय तहहरुलाई लकडाउन लगाउने बाटो खुलेको थियो । साउन १६ गते विराटनगर महानगरपालिकाले संक्रमण बढेको भन्दै पहिलो पटक लकडाउन गरेको थियो ।

विहिबारसम्म मोरङमा लकडाउन गर्ने स्थानीय तहको संख्या ९ पुगेको छ । मोरङका विराटनगर, रंगेली, रतुवामाई, धनपालथान, सुनवर्षी, सुन्दरहरैचा, पथरी शनिश्चरे, बेलबारी, कानेपोखरीले लकडाउन गरेका छन् ।

मोरङका जहदा र कटहरी गाउँपालिकाले लकडाउनको घोषणा नगरे पनि कार्यालय र गाउँपालिका अन्र्तगतका वडा कार्यालय बन्द गरेका छन् । ग्रामथान, मिक्लाजुङ, उर्लाबारी, केराबारी, बुढीगंगा, लेटाङमा लकडाउन गरिएको छैन । ६ वटा स्थानीय तहरुले अत्यावश्यक काम बाहेक घर बाहिर ननिस्कन आग्रह गरेको बताएका छन् ।

संघीय सरकारले कोरोना भाइरसको रोकथाम तथा नियन्त्रणका गत चैत ११ गतेदेखि शुरु गरेको लकडाउन साउन ७ गतेदेखि हटाएको थियो । साउन ७ गतेसम्म मोरङमा कोरोना संक्रमितको संख्या २ सय ११ थियो ।

लकडाउन खुलेको दुई सातामै मोरङमा २ सय १९ जना थपिए । मोरङमा विहिबारसम्म संक्रमितको संख्या ४ सय ३० पुगेको छ । मोरङका १७ वटै स्थानीय तहमा संक्रमण फैलिएको छ ।