काठमाडौं– मलेसियामा सेक्युरिटी गार्ड कुटपिटमा संलग्न दुवै जना नेपाली नागरिक भएको खुलेको छ।
मलेसियास्थित नेपाली राजदूतावासका अनुसार पीडित ईस्लाम हुसेन नवलपरासीका र पीडक राम गोपाल मुराउ कपिलवस्तुका स्थायी बासिन्दा हुन्।
मलेसियाको अध्यागमन कानुनअनुसार दुवैजना मलेसियामा अवैधानिक रुपमा बसोबास गरिरहेको पाइएको छ।
राजदूतावासका अनुसार क्वालालम्पूरको एम थ्री मलमा ७ जुलाई २०२० को बिहान करिब १० बजेतिर कुटपिट भएको भिडियो कैद भएको थियो।
घटनाका पीडित सेक्युरिटी गार्ड र पीडक सुपरभाइजरको रुपमा कार्यरत छन्।
राजदूतावासको सम्पर्कमा आएका दुवै जनाले भिडियोमा देखिने पात्र आफुहरु भएको स्वीकार गरेका छन्।
घटनाबारे थप अनुसन्धान क्वालालम्पूरको वाङ्सामाजुस्थित प्रहरी स्टेशनले गर्ने जनाइएको छ।
कुटपिट गरेको भिडियो सामाजिक सञ्जालमा आएपछि मलेसियन राजदूतावासले खोजी सुरु गरेको थियो।