प्रदेश १ मा १८ संक्रमित थपिए, कोशी अस्पतालको ओपीडी बन्द

विराटनगर– प्रदेश १ मा विहिबार १८ जना कोरोना संक्रमित थपिएका छन् ।

मोरङमा ८, झापामा ४, सुनसरी, उदयपुर र सोलुखुम्वुमा २–२ जनामा संक्रमण देखिएको सामाजिक विकास मन्त्रालयले जनाएको छ ।

मोरंगको विराटनगरमा ५ पुरुष र ३ महिला, झापाको शिवसताक्षीमा ३ पुरुष, दमकमा १ महिला, सुनसरीको धरान र इटहरीमा १–१ पुरुष, उदयपुरको वेलकामा १ महिला, १ पुरुष र सोलुखम्वुको दुधकुण्डमा २ पुरुषको रिपोर्ट पोजेटिभ आएको सामाजिक विकास मन्त्रालयका प्रवक्ता डा.सुरेश महेताले बताए । प्रदेश १ मा कोरोना संक्रमितको संख्या ९ सय ९३ पुगेको छ ।

प्रदेश १ मा विहिबार ४२ जना डिस्चार्ज भएका छन् । पूर्वाञ्चल विश्वविद्यालय कोभिड १९ आईसोलेसन अस्पताल गोठगाउँबाट ३४ पुरुष, वीपी कोइराला स्वास्थ्य विज्ञान प्रतिष्ठान धरानबाट ६ पुरुष र कोशी अस्पताल कोभिड १९ उपचार केन्द्र विराटनगरबाट २ पुरुष डिस्चार्ज भएको सामाजिक विकास मन्त्रालयले जनाएको छ । प्रदेश १ मा विहिबार सम्म ७ सय ८९ जना डिस्चार्ज भएका छन् ।

प्रदेश १ मा विहिबार ६ सय ५२ जनाको पीसीआर परीक्षण गरिएको छ ।

कोशी अस्पतालको ओपीडी बन्द

कोशी अस्पताल विराटनगरमा कार्यरत थप दुई जना स्वास्थ्यकर्मीमा विहिबार कोरोना संक्रमण पुष्टि भएपछि अस्पतालको ओपीडी (बहिरंग) विभागको सेवा बन्द गरिएको छ ।

कोरोनाबाट यसअघि कोशीका २ जना स्वास्थ्यकर्मी संक्रमित भएका थिए । कोशीकै ल्याबमा परीक्षण गर्दा ओपीडी विभागकी इन्चार्ज रहेकी नर्सिङ स्टाफ र नाक, कान तथा घाँटी रोग विभागमा कार्यरत पारमेडिक्समा संक्रमण देखिएको अस्पतालका मेडिकल सुपरिटेन्डेन डा. चुमनलाल दासले बताए ।

अस्पतालमा संक्रमित हुने स्वास्थ्यकर्मीको संख्या थपिँदै गएपछि अनिश्चितकालका लागि ओपीडीबाट प्रदान गरिँदै आएका सेवा बन्द गर्नु परेको हो । अर्को सूचना जारी नहुनजेलसम्मलाई सेवा बन्द गरिएको उनको भनाइ छ ।

कोरोनाले मृत्यु भएकाकी पत्नीको रिपोर्ट पोजेटिभ

कोरोना भाइरसको संक्रमणको कारण मृत्यु भएका मोरङको सुनवर्षी नगरपालिका–८ का ४५ वर्षीय पुरुषकी पत्नीको पनि रिपोर्ट पोजेटिभ आएको छ । स्वाब संकलन गरेर कोशी अस्पताल विराटनगरको प्रयोगशालामा गरिएको परीक्षणपछि विहिबार पत्नीमा पनि कोरोना संक्रमण पुष्टि भएको हो ।

अस्पतालका सुपरिटेन्डेन डा. चुमनलाल दासले कोरोना संक्रमणबाट मृत्यु भएका पुरुषकी ३२ वर्षीया श्रीमतीको पनि रिपोर्ट पोजेटिभ आएको जानकारी दिए ।

पीयूको डिन कार्यालय बन्द

पूर्वाञ्चल विश्वविद्यालय अन्तर्गत व्यवस्थापन संकाय डिन कार्यालयमा कार्यरत एकजना कर्मचारीमा कोरोना संक्रमण पुष्टि भएपछि कार्यालय बन्द गरिएको छ ।

विराट अस्पतालका कर्मचारीसँग सम्पर्कमा रहेका डिन कार्यालयका मुख्य सहायक कर्मचारीमा संक्रमण पुष्टि भएको हो । कर्मचारीमा संक्रमण देर्खिपछि डिन कार्यालयका १७ जना कर्मचारीको बिहीबार स्वाब संकलन गरिएको डिन डा.बिजु थपलियाले जानकारी दिए ।

इटहरीको सेवा बन्द

सुनसरीको इटहरी उपमहानगरपालिकाका इन्जिनियरलाई कोरोना संक्रमण देखिएपछि कार्यालयको सेवा बन्द गरिने भएको छ । उपमहा नगरको विहिबारको बैठकले वडा कार्यालय सम्मको सेवा प्रवाह बन्द गरिने निर्णय गरिएको नगर प्रमुख द्धारिकलाल चौधरीले बताए ।

उपमहानगरपालिकाले तत्काल लकडाउन नगर्ने भएपनि वडा कार्यालयसम्मको सेवा बन्द गर्ने निर्णय गरेको उनले बताए ।