कम्युनिस्ट पार्टी कमिटी प्रणालीमा चलाउनुपर्छ : नेता नेपाल 

काठमाडौं- नेकपाका वरिष्ठ नेता माधवकुमार नेपालले अर्काको अस्तित्व स्वीकार नगर्ने र ‘म नै सर्वेसर्वा हुँ र म नभए केही पनि चल्दैन’ भन्ने भावनाले विगतमा कम्युनिस्ट आन्दोलन थिलथिलो बनाएको स्मरण गर्दै त्यस्ता गलत प्रवृत्तिविरुद्ध अझै दृढतापूर्वक उभिनुपर्ने बताएका छन्।

नेकपाका संस्थापक महासचिव पुष्पलालको स्मृति दिवसमा बुधबार विज्ञप्ति जारी गर्दै नेता नेपालले भनेका छन्, ‘आज पनि कहीँकतै त्यस्ता गलत, व्यक्तिवादी र गैरकम्युनिस्ट प्रवृत्ति देखा पर्दछन् भने त्यसविरुद्ध दृढतापूर्वक उभिनु सबै इमानदार नेताकार्यकर्ताको कर्तव्य हुन्छ।’

उनले नेकपालाई अझै बलियो, एकताबद्ध, संस्थागत, विधि–पद्धतिमा आधारित, जनतासँग अझै घनिष्ट, परिवर्तनको मार्गमा दृढ र वैचारिक रुपमा स्पष्ट बनाउन आवश्यक रहेकोमा जोड दिएका छन्।

नेपालले भनेका छन्, ‘कम्युनिस्ट पार्टी कुनै व्यक्तिको ‘अलौकिक’वा ‘चामत्कारिक’ नेतृत्वमा विश्वास गर्ने संस्था नभई सामूहिक नेतृत्व प्रणालीमा विश्वास गर्ने क्रान्तिकारी संस्था भएकाले यसलाई त्यहीअनुसार कमिटी प्रणालीका आधारमा चलाउनुपर्छ।’

पुष्पलाल स्मृति प्रतिष्ठानका अध्यक्ष नेता नेपालले पुष्पलालका आदर्शलाई दृढतापूर्वक पछ्याइरहने प्रतिबद्धता जनाउँदै उनको क्रान्तिकारी, सरल, बौद्धिक, संघर्षशील र निष्ठापूर्ण व्यक्तित्वबाट सबैलाई अभिप्रेरित रहन कामना गरेका छन्।