२० ग्राम खैरो हेरोइनसहित कञ्चनपुरबाट ३ जना पक्राउ

धनगढी- झन्डै २० ग्राम लागु औषध खैरो हेरोइनसहित तीन जना पक्राउ परेका छन्। शुक्रबार उनीहरूलाई कञ्चनपुरबाट पक्राउ गरिएको जानकारी प्रहरीले दिएको छ। 

पक्राउ पर्नेमा जिल्लाको भीमदत्त नगरपालिका–१ तिलकपुरका ४२ वर्षीय रमेश दमाई, सोही ठाउँ बस्ने ३७ वर्षीय तपेन्द्र स्वाँर र भारत उत्तर प्रदेश बरेलीका २८ वर्षीय मोहमद आरिफ छन्।

लागु औषध नियन्त्रण ब्युरो र जिल्ला प्रहरी कार्यालयबाट खटिएको संयुक्त प्रहरी टोलीले उनीहरुलाई बेदकोट नगरपालिका–३ शंकर ईट्टाभट्टा नजिकबाट पक्राउ गरेको जिल्ला प्रहरी कार्यालय कञ्चनपुरका प्रहरी नायव उपरीक्षक सिद्धराज न्यौपानेले बताए।

उनीहरुका साथबाट १९.९७ ग्राम खैरो हेरोइन, दुई थान मोटरसाइकल बरामद भएको प्रहरी नायब उपरीक्षक न्यौपानेले बताए। उनीहरूमाथि थप अनुसन्धान भइरहेको प्रहरीले बताएको छ।