काठमाडौं- कोरोना संक्रमणबाट थप तीन जनाको मृत्यु भएको छ। मृत्यु हुनेमा काठमाडौँका दुई र सिन्धुपाल्चोकका एकजना छन्।
स्वास्थ्य तथा जनसंख्या मन्त्रालयका अनुसार मृत्यु हुनेमा काठमाडौँ जिल्ला काठमाडौँ महानगरपालिका–१० शंखमूलका ६० वर्षीय पुरुष र गोकर्णेश्वर नगरपालिका–४ का ५४ वर्षीय पुरुष तथा सिन्धुपाल्चोकको पाँचपोखरी गाउँपालिका–६ का ४५ वर्षीय पुरुष छन्।
शंखमूलका संक्रमित फोक्सोमा पानी जमेको तथा मिर्गौला रोगका कारण यही असार १६ गते पाटन अस्पतालमा भर्ना भई उपचाररत थिए। उनमा असार १७ गते कोरोना ‘पोजेटिभ’ देखिएको थियो। उनको यही असार २६ गते मृत्यु भएको हो।
यस्तै गोकर्णेश्वर–४ का पुरुष मिर्गौला रोगका उपचारका लागि सिनामङ्गलस्थित काठमाडौँ मेडिकल कलेजमा भर्ना भएका थिए। उनको यही असार २५ गते मृत्यु भएको हो।
यसैगरी सिन्धुपाल्चोकको पाँचपोखरी–६ का संक्रमित क्षयरोगको उपचारका लागि यही असार १८ गते पाटन अस्पतालमा भर्ना भएका थिए। उनमा यही असार २२ गते कोरोना ‘पोजेटिभ’ देखिएको थियो।
उनको यही असार २५ गते मृत्यु भएको स्वास्थ्य मन्त्रलायले जनाएको छ। यससँगै नेपालमा कोरोना संक्रमणबाट मृत्यु हुनेको संख्या ३८ पुगेको छ। रासस