ललितपुरको महालक्ष्मी नगरपालिकाको ३ वडा सिल, घर बाहिर निस्किन रोक

ललितपुर- कोरोना संक्रमित भेटिएपछि ललितपुरको महालक्ष्मी नगरपालिकाले तीनवटा वडा सिल गरेको छ।

वडा नम्बर ८ मा कोरोना संक्रमितको संख्या बढ्दै गएपछि नगरपालिकाले ७ र ९ वडासमेत सिल गरेको नगरपालिका प्रमुख रामेश्वर श्रेष्ठले बताए।

नगरपालिकाले अत्यावश्यक कामबाहेक घरबाट बाहिर नस्किन पनि आग्रह गरेको छ। सरकारी तथा गैरसरकारी कार्यालय, बैंक तथा वित्तीय संस्थाबाट प्रवाह हुने अत्यावश्यक सेवाबाहेक सबै सेवा बन्द हुने जनाइएको छ।

खाद्यान्न पसल र व्यवसायमा कम्तीमा एक मिटर दूरी कायम गरेर बिहान ७ देखि ९ बजे सञ्चालन अनुमति दिइएको नगरपालिका प्रमुख श्रेष्ठले बताए।

नगरपालिकाको नियम उलंघन गरेमा संक्रामक रोग ऐन, २०२० बमोजिम सम्बन्धित निकायबाट कारबाही गरिने उनले बताए।