बालिका मृत भेटिइन्, बलात्कारको आशंकामा अघोरी बाबा समातिए

धनुषामा १० वर्षीया बालिका मृत फेला परेकी छिन्।

धनुषाको जनकपुरधाम उपमहानगरपालिका–२१ स्थित कुर्थामा रहेको दूधमती नदीको किनारमा बालिका कञ्चनकुमारी पजियारको शव फेला परेको प्रहरीले जनाएको छ।

स्थानीयले बालिकाको बलात्कारपछि हत्या भएको हुनसक्ने आशंका गरेका छन्। धनुषाका प्रहरी नायब उपरीक्षक रामेश्वर कार्कीले घटनास्थललाई सिल गरेको जानकारी दिए।

खेतमा धान रोपिरहेका एक किसानले दूधमती नदीको किनारबाट दुर्गन्ध आएपछि हेर्न जाँदा बालिकाको शव देखेका थिए।

बुधबार दिउँसो भैंसी चराउन गएकी बालिका अबेर रातिसम्म घर नफर्किँदा गाउँभर खोजिएको थियो। बालिका नभेटिएपछि परिवारले बिहीबार प्रहरीमा उजुरी दिएको थियो।

डिएसपी कार्कीले स्थानीयको आशंकामा एक जना अघोरी बाबालाई नियन्त्रणमा लिएको जानकारी दिए। उनले घटनाबारे अनुसन्धान भैरहेको जानकारी दिए।