संसद् अधिवेशन अन्त्यप्रति कांग्रेसको गम्भीर आपत्ति

काठमाडौं– संसद् अधिवेश अन्त्य गर्नु गलत भएको भन्दै प्रमुख प्रतिपक्षी दल नेपाली कांग्रेसले गम्भीर आपत्ति जनाएको छ।

बिहीबार प्रेस विज्ञप्ति जारी गर्दै कांग्रेसले संसद् अधिवेशन आह्वान र अन्त्यको निश्चित प्रक्रिया हुने भन्दै सरकारले गरेको हठात् निर्णयप्रति असहमति जनाएको हो।

कांग्रेसले भनेको छ, ‘कोरोनाको चुनौती सामना गर्न प्रस्तुत संकल्प प्रस्तावदेखि एमसीसी सम्झौता र महत्वपूर्ण विधेयकहरुबारे टुंगोमा नपुगी अधिवेशन अन्त्य गरिनु दुःखद छ।’

कांग्रेसले सरकारलाई प्रश्न गरेको छ– जनताको जीवन प्रधान की सत्ताको राजनीति ? संसद् अधिवेशन अन्त्य गर्दा आफूसँग परामर्श नगरिएको पनि कांग्रेसले जनाएको छ।

विज्ञप्तिले लेखिएको छ– ‘सत्तारूढ दलभित्रको विवाद र द्वन्द्वको प्रभाव संसद् अधिवेशनमा पर्नु दुःखद छ।’