स्वास्थ्यमन्त्री भन्थे– पीसीआर परीक्षण बढाउँछौं, तर घट्यो

स्वास्थ्यमन्त्री भानुभक्त ढकालले पीसीआर परीक्षणको दायरा बढाउने सार्वजनिक अभिव्यक्ति दिए पनि परीक्षणको दायरा झनै घटेको छ ।

मन्त्री ढकालले असार १५ (हिजो) देखि दैनिक १० हजारको परीक्षण गर्ने भने पनि त्यति परीक्षण हुन सकेको छैन । सोमबार ७ हजार ७९१ परीक्षण गरिएकोमा मंगलबार

३ हजार ८० नमुनाहरु घटेका छन् । मंगलबार ४ हजार ७११ नमुना परीक्षण भएको छ ।

सरकारको दैनिक १० हजार पीसीआर परीक्षणको लक्ष्यमा पुग्न आजको संख्यामा ५ हजार २८९ नपुग हो ।

हालसम्म पीसीआर विधिबाट २ लाख २८ हजार नमुनाको परीक्षण गरिएको छ भने करिब ३ लाख नमुना आरडिटी माध्यमबाट परीक्षण भएका छन् । सरकारले विभिन्न ३३ वटा प्रयोगशालाहरु परीक्षणको लागि तयार रहेको बताए पनि परीक्षणको दायरा भने बढ्न सकेको छैन ।

मन्त्रालयका प्रवक्ता डा. जागेश्वर गौतमले प्रयोगशालाको व्यवस्थापन गर्ने क्रममा केही ढिला हुन पुगेको भन्दै मन्त्रीको भनाइको बचाउ गरेका छन् ।

गौतमले भने, ‘सोमबारबाट दैनिक १० हजार पीसीआर परक्षिण गर्ने भने पनि ल्यावहरुको व्यवस्थापन गर्ने क्रममा ढिला भएको हो, अब छिट्टै त्यो लक्ष्य पूरा हुन्छ ।’