रुपन्देहीमा ४२ जना पत्रकारको पीसीआर विधिबाट कोरोना परीक्षणको लागि स्वाब संकलन भएको छ ।
लुम्बिनी प्रेस क्लबको संयोजनमा उच्च जोखिममा रहेका नेपाल–भारत सीमावर्ति क्षेत्र भैरहवा, मर्चवार, धकधइ, लुम्बिनी क्षेत्रमा क्रियाशील विभिन्न सञ्चारमाध्ययममा काम गर्ने पत्रकारहरुको पीसीआर परीक्षणको लागि स्वाब संकलन गरिएको लुम्बिनी प्रेस क्लबका अध्यक्ष दीपेश पछाईले बताए ।
कोरोना परीक्षण गर्न सिद्धार्थनगर नगरपालिका, लुम्बिनी सांस्कृतिक नगरपालिका, ओमसतिया गाउँपालिका, रोहिणी गाउँपालिका, सियारी गाउँपालिका, मायादेवी गाउँपालिका र कोटहिमाई गाउँपालिका अन्तर्गत रहेर रिर्पोटिङ गर्ने पत्रकारहरुको स्वाब संकलन गरिएको हो ।
जनस्वास्थ्य प्रयोगशाला प्रदेश नम्बर ५ मा पठाइएको ४२ जना पत्रकारहरुको स्वाब संकलनको रिपोर्ट ४ दिनमा आउने छ । भीम अस्पतालमा ४२ जना पत्रकारहरुको पिसीआर विधिबाट कोरोना परीक्षण गर्नका लागि स्वाब संकलन गरिएको अस्पतालका सूचना अधिकारी गोपाल उपाध्यायले बताए ।
पत्रकारहरुको कोरोना चेकजाँचमा प्रदेश प्रयोगशाला भैरहवा, भिम अस्पताल भैरहवा, रोटरी क्लव अफ लुम्बिनी र जेसीआइ सिद्धार्थ लेडी जेसिजले सहयोग गरेका छन् ।