नागरिकता विधेयकसम्बन्धी प्रतिवेदन प्रतिनिधिसभामा पेश हुँदै

राज्य व्यवस्था तथा सुशासन समितिबाट बहुमतले पारित भएको नागरिकता विधेयकसम्बन्धीको प्रतिवेदन आज प्रतिनिधिसभामा पेश हुने भएको छ।

दिउँसो १ बजेबाट सुरु हुने बैठकमा समिति सभापति शशि श्रेष्ठले समितिले पारित गरेको प्रतिवेदन पेश गर्ने कार्यसूची छ।

समितिले आइतबार नेपाली नागरिकसँग विवाह गरेर आउने विदेशी महिलाले ७ वर्षपछि नेपालको अंगीकृत नागरिकता लिन सक्ने गरी प्रतिवेदन पारित गरेको थियो।

प्रतिपक्षी दलहरु नेपाली कांग्रेस, राजपा र संघीय समाजवादीले भने असहमति राख्दै फरक मत राखेका थिए। समितिले बहुमतले निर्णय गरेकाले उनीहरुले राखेको फरक मत भने प्रतिवेदनमा समेटिएको छैन।

०७५ साउनमा संसदमा दर्ता भएको सो विधेयक २ वर्षपछि समितिबाट पुनः संसदमा आएको हो । अब विधेयकमाथि प्रतिनिधिसभामा छलफल हुनेछ।