६ लाख हिनामिना गरेको अभियोगमा प्रधानाध्यापकविरुद्ध मुद्दा

काठमाडौं- विद्यालयको ६ लाख रकम हिनामिना गरेको अभियोगमा पर्साका एक विद्यालयका प्रधानाध्यापकविरुद्ध अख्तियार दुरुपयोग अनुसन्धान आयोगले मुद्दा दायर गरेको छ।

नेपाल राष्ट्रिय आधारभूत विद्यालयका तत्कालीन प्रधानाध्यापक सन्तोषप्रसाद गुप्ताविरुद्ध अख्तियारले आइतबार विशेष अदालतमा मुद्दा दायर गरेको हो।

गुप्ताले जिल्ला शिक्षा कार्यालयबाट भवन र शौचालय निर्माणका लागि प्राप्त रकममध्येबाट ६ लाख रुपैयाँ हिनामिना गरेको अख्तियारले जनाएको छ।

अख्तियारका प्रवक्ता प्रदीपकुमार कोइरालाका अनुसार कुल १६ लाख रकममध्ये आफ्नो नाममा पाँच लाख र विश्वनाथ साह कानुका नाममा एक लाख निकासा गरी फरार रहेको खुलेको छ।