रोकिएन देवदहमा नदीजन्य पदार्थको चोरी निकासी

देवदह क्षेत्रका नदीबाट नदीजन्य पदार्थको चोरी निकासी गर्दै गरेको अवस्थामा प्रहरीले ट्याक्टर र एक जेसिवी नियन्त्रणमा लिएको छ ।

देवदह प्रहरी चौकीका इन्चार्ज प्रहरी निरीक्षक दीपक महतका अनुसार प्रहरीले ७ वटा ट्याक्टर र एक जेसिवी नियन्त्रणमा लिएको हो ।

प्रहरीले खोलाबाट लु १ क ३३०० नम्बरको जेसिबीलाई नियन्त्रणमा लिएको छ । यसैगरी लु ४ त ४३३४, लु ४ त ४२८७, लु ४ त ५६१६, लु ४ त ९४९, लु ३ त ४४३०, लु ३ त ४६३६ र ना ६ त ३२८६ नम्बर ट्याक्टर पनि नियन्त्रणमा लिएको छ । प्रहरीले नियन्त्रणमा लिएका मध्ये तीनवटा ट्याक्टर बालुवा खन्याएर भाग्दै गरेको अवस्थामा र चारवटा मिस्कट सहित पक्राउ परेका हुन् ।

अवैध रुपमा भलुही खोलाबाट नदीजन्य पदार्थको उत्खनन र ओसारपसार गर्दै गरेको अवस्थामा प्रहरीले सवारीसाधन नियन्त्रणमा लिएको भए पनि अवैध कारोबारमा संलग्नहरुले स्थानीय महिलाहरुलाई प्रयोग गरी प्रहरीविरुद्ध नाराबाजी गराएका थिए । स्थानीय महिलाहरुले अवरोध गरेपछि केही समय भलुही चोकमा तनाव समेत भएको थियो ।

नगरका प्रमुख प्रशासकीय अधिकृत हरिदत्त कँडेलले भने सो विषयमा आफूलाई अहिलेसम्म जानकारी नआएको बताएका छन्।

यसअघि पनि रुपन्देहीको क्षेत्र नम्बर १ अन्तर्गत पर्ने देबदह क्षेत्रमा ढुंगा, गिट्टी, बालुवाको अवैध उत्खनन भएको विषयमा समाचार सार्वजनिक हुँदै आएको थियो। प्रहरीले यसअघि पनि एउटा जेसिबी नियन्त्रणमा लिएको थियो । तर राजनीतिक दबाबको कारण प्रहरीले सामान्य अनुसन्धान गरेर छाडेको थियो ।

देवदहको घोडाहा, रोहिणि, कजरारजस्ता ३ मुख्य नदीजन्य श्रोत भएको खोलामा विगतका बर्षमा ठेक्का लगाएर नगरपालिकाले लाखौं राजस्व आम्दानी गर्ने गर्दथ्यो । तर यो बर्ष ठेक्का लगाउन सकेको छैन ।