काठमाडौं– नेपालको ओपनिङ ब्याट्स्म्यान आशिफ शेखले एकदिवसीय क्रिकेटमा करियरको पहिलो अर्धशतक प्रहार गरेका छन्। उनको ९० रनको सहयोगमा नेपालले ओमानलाई १९७ रनको लक्ष्य प्रस्तुत गरेको छ।
ओमानको अल इमिरेत मैदानमा जारी खेलको पहिलो पारीमा नेपालले ४७ ओभर ४ बलमा सम्पूर्ण विकेट गुमाएर १९६ रन बनाएको हो।
मंगलबारको खेलमा पपुवा न्युगिनीविरुद्ध एक दिवसीय मैत्रीपूर्णमा डेब्यु गरेका आशिफले आफ्नो चौथो खेलमा पहिलो अर्धशतक प्रहार गरेका हुन्।
उनले ११२ बलमा एक छक्का र सात चौका प्रहार गर्दै ९० रन बनाएर एक दिवसीय क्रिकेटमा पहिलो अर्धशतक पूरा गरे। यसअघि उनको उच्च स्कोर ३० रन थियो, जुन उनले पपुवा न्युगिनीविरुद्धको पहिलो खेलमा बनाएका थिए।
अहिले जारी खेलमा नेपालले पहिलो विकेटका रुपमा कुशल भुर्तेललाई गुमाएको थियो भने दोस्रो विकेटको रुपमा कप्तान ज्ञानेन्द्र मल्लाई गुमाएको थियो।
त्यस्तै रोहित पौडेल २० रन बनाएर आउट भएका छन्। विनोद भण्डारी, सोमपाल कामी, विक्रम शोब र कुशल मल्लले पनि सम्झनलायक प्रदर्शन गरेनन्।
सन्दिप लामिछानेले १६ रन बनाउँदो करण केसीले २१ रन बनाए। बलिङतर्फ ओमानका विलाला खानले चार विकेट लिए भने नेस्टर धम्बाले २ विकेट लिए। त्यस्तै, मोहम्मद नदिमले एक विकेट गिराए।