भारतमा एकै दिनमा ११ हजार ५०२ जना कोरोना भाइरस संक्रमित भएका छन्।
केन्द्रीय स्वास्थ्य तथा परिवार कल्याण मन्त्रालयले सोमबार दिएको जानकारीअनुसार पछिल्लो २४ घण्टामा कोरोना भाइरसका कारण भारतमा ३२५ जनाको मृत्यु भएको छ। भारतमा अहिलेसम्म कोरोना भाइरसका कारण मृत्यु भएकाहरुको संख्या ९ हजार ५२० पुगेको छ।
त्यसैगरी संक्रमितहरुको कुल संख्या ३ लाख ३२ हजार ४२४ पुगेको छ। १ लाख ६९ हजार ७९८ जना भने संक्रमणमुक्त भएका छन्।
यसैबीच, भारतले देशव्यापी लकडाउन फेरि लागू गर्न सक्ने संकेत गरेको छ। दुई साताअघि लकडाउन खुकुलो बनाएपछि भारतमा कोरोनाको संक्रमण र मृत्यु तीव्र रुपमा बढिरहेको छ।
संक्रमणका हिसाबले भारत विश्वकै चौथो नम्बरमा पुगिसकेको छ। भारतभन्दा बढी प्रभावित राष्ट्र अमेरिका, ब्राजिल र रुस हुन्।
लकडाउन खुकुलो बनाउँदा दिनदिनै ठूलो संख्यामा कोरोना संक्रमित थपिएपछि प्रधानमन्त्री नरेन्द्र मोदी लकडाउन फेरि लागू गर्ने मनसायमा पुगेको भारतीय सञ्चारमाध्यमले जनाएका छन्।
विभिन्न राज्यले कोरोना भयावह बनेको भनेर केन्द्र सरकारलाई रिपोर्ट गरिरहेको बताइएको छ। मोदीले विभिन्न राज्यका मुख्यमन्त्रीसँग यही जुन १६ र १७ तारिखमा बैठक गर्दैछन्। मुख्यमन्त्रीसँगको सुझावपछि मोदीले निर्णय गर्ने बताइएको छ।